زجل: عبد الله شوكا
تكلم الحي وغنى الهزار
وشدا العصفور في كل خيمة ودار
مزين الصيحة مواتية الكيطار
السوسدي هداك ترحمو يا غفار
الهم تحدا البارح زاد اليوم
لغطة حنينة تحرك المضيوم
الهزار هداك ماشي صوت البوم
واش البلوح كيطيح من شجر الدوم
مال كلتنا جافة ما بغات تروى
سمع الكلام وكتب يا بوعروة
من غاب السوسدي والميزان في الخوا
ومول الفز يقفز ويظل يتنوى
هذا حب الرمان تساس في الخريف
أي زمان هذا الطف يا لطيف
دابا تشوف وتعذرني وطوع بالسيف
وتشوف العود الحران يعطش ويجيف
السوسدي يا هزار يا نقطة العسل
يا كلمة موزونة معنى وتغسل
على اللي مصيبتو مصيبة وفي الهم يجطل
وعلى حب الرمان اللي غصنو تساس وذبل
