ليلة الفرح

بمناسبة اليوم العالمي للغة الأم، 21 فبراير. احتفالا باللغة الدارجة المغربية الحاملة لأجمل التعابير و أرقى القيم المجتمعية.

بقلم الشاعر المغربي قيس بنيحي

الحومة زهات و الحي بهاج
جاهوم غريب حامل التاج
يقلب عَلى مورادو
سول يمين و سول شمال
دلوني فين دار الجمال
كالو لي هاذي بلادو
ليلة الفرح شافو حشمان
وسط أصحاب و أهل العرسان
من يومها ما شاف وسادو
كل صباح يخرج طمعان
يلقى خبار أو إشارة تبان
توريه طريق أم ولادو
فيوم من أيام العز و الخير
جاه حبيب بخبار كبير
الفرحة سقات خدودو
سول فيٌا الصغار و الكبار
و خدا خباري من عند الجار
و جاني الهدية فيدو
لقاني شحال و أنا سرحانة
فليلة العشق اللي غزانا
ليلة عيدي و عيدو
تقبضات نفسي مع سوالو
خفت قلبي و مرادي ما ينالو
و شجاعة حبيبي ما تفيدو
تزغريتة طلقات سراحي

جمعاتني بيه وعلنات فراحي
اليوم و كل يوم نعيدو
الحومة لبسات لباس العرس
حاملين ورد، زهر وغرس
يهنيو، يغنيو و يزيدو