عن ذكريات مدينة سطات

زجل : عبد الله شوكا

خليني نسول على أيام مشات
طفولة وصبا وتعليم وذكريات
أيامي تشهد عليها مدينة سطات
عليها نقلب الأرشيف والصفحات
فين أيامك يالسطات يالحبيبة
فين حلاقي الربيب في سوق شطيبة
كنت نظل نجول ونلالي
ونشرب أتاي في الحفالي
واخ كنت نقرا كنت مسالي
وتقشابي مع بشارة والنيفالي

هاديك سطات العزيزة ما تخفى
شحال لعبت في الحارثي وتيران الحلفة
قريت مع الكران هادوك الجواد
من مولاي اسماعيل حتى لابن عباد
سطات شحال عزيزة هاديك البلاد
في قهوة الشاف فراجة وكيسان البراد
في سطات نجحت وبلغت مرادي
وما ننسى النهيضة ولعب ميعادي
في سطات ما خليت حتى زنقة ومريرة
وملي نتزير كنت نمشي لسينما كاميرا
كاسكروط طون وحرور في كوميرا
وملي نخرج في زنقة الذهيبية نضرب دويرة

انت يا سطات مدينتي الحبيبة
ما ننسى اصحابي معين والزيتوني بنذهيبة
من السماعلة قريت مع الكرف ورحمونة
والدراري اصحابي من حي ميمونة
شحال من ايام دوزت في البطوار
وخويا لقمان كان يرحب بي في الدار
الله يرحم استاذي العزيز سي عثيار
بفضلو كنت من التلاميذ الخيار
نترحم على مديرنا سي كرار
في مولاي اسماعيل كان هو مول الشوار
الله الله عليك يا سطات الله

هانا تلاقيت مع نور الدين رزق الله
انا مجذوب نكول ليك لغارة
جددت العهد مع صيفي وبشارة
نكول ليك يا سطات لا تغيبيشي
هانا مع الخوت الكيلاني وطيطيشي
سطات انشودة ولحنك مساوي
شحال فرحت بلقاي مع راجح وعزيز لمتاوي
نتمنى الايام تكاد وتزيان
ملي تلاقيت مع عبد الرحيم بوزيان
تمنيت ترجع زنيكة ولد الباشا
وفيها نرجع نتنزه ونتمشى
شحال ديال الايام زادت ومشات
الايام الزينة ديال مدينة سطات