زجل بقلم عبد الله شوكا، كاتب وصحافي-المغرب
فين الفرينة وفين المجمر
وفين الفران والخبز المحمر
وفين الصينية والبراد المعمر
وفين الناكة وفين ولدها البكر
وفين السمن والكرصة والعسل الحر
وفين مقراج النحاس والسبولة تهتر
فين الكاعة والدرية والحصادة
وفين الخبير والودن على الوسادة
وفين البوصاق وخوه بوجعادة
طلبت العالي ترجع لينا ديك العادة
فين النخضة واللبن والكركاز
وفين الرحى والمنجج والمهراز
بغيت الفاخر، بعد علي بوطاكاز
من ماكلة اليوم راني وليت معكاز
كانت تولد البكرة وناكلو اللبا
والمجروح فينا كان يداوى بالشبا
كانت الخيمة قبرية وبيت وقبة
والغنم نشوفوها سارحة في الشعبة
فين الغمرة وفين الكلمون والدرسة
وفوق النادر شحال كانت زوينة النعسة
كانت الصحة وفمك ما يوجعوه ضرسة
وكان قليل فين تجيك العطسة
فين الغنم الصايحة وفين الجبن
وفين الخير الدافك زرع وتبن
وفين الوقافة وفين شكوة اللبن
وفين غسيل البطانية فوق المسن
فين تيغشت وفين غوات العطار
وفين جموع النسا ومقدمة الدوار
وفين الخشبة واللوحة وداك المسمار
وفين الحرث والصابة بالقنطار
فين الصينية وفين جلسة الأحباب
وفين اللمة وتقرقيب الناب
وفين الشواري والروابة والحلاب
وفين القلوش وفين ماعز الكساب
فين الواد الصافي تحت الظلال
وفين زقزقة الطير مع الإشراق والآصال
وفين ريحة التراب من بعد الأمطار
وفين وجه الفلاح يضحك مع الإثمار
فين وفين هي ديك الأيام
أيام العزة والنية والسلام
راحت الهوية وبقى غير الكلام
والبادية كتبكي على ماضيها قدام.
