بقلم الشاعر محمد لمليجي – فرنسا
ماحلاك يامراكش يا راحة الروح
يالمدينة الحمراء فيها الحلم يتحقق
اليوم بسرك لعظيم جيت نبوح
ونحكي اشحال أنا بجمالك معلق
أسوارك فيها تاريخ عرب وشلوح
وكل من زارك ما يبقاش مقلق
هذا قصر البديع مرحب ديما بينا
يروي أمجاد شامخة من أزمان
وساحة الفنا هي تفكرنا يلا نسينا
بحكايات ألف ليلة وكان ياما كان
نهارها كل بهجة وفرحة تهنينا
وليلها يسعد القلب ويزيد الحنان
وداك النخل العالي يتمايل فسماه
عازم يخلي لعقول تحلم ليل ونهار
وفي كل هبة ريح يسبح لمولاه
ويعانق ورد باب اجديد مول السوار
الله عليك يا مراكش زينك فين نلقاه
شكون يعطيني مفتاحك وكاع لخبار
كل العالم راه يشهد ليك ببهاك
أنت أرض عظيمة وفيك شلا أمجاد
سبحان الله الكريم هو اللي أعطاك
سر باهي مالو نظير يا أجمل بلاد
من زارك يعشقك ويقول ما أحلاك
يا مدينة سبعة رجال من عهد لجداد
أنت راحة الروح وشكون يسخا بيك
يا بهجة المدن يا وردة بين النخيل
سعدات من زارك وما يتخلى عليك
يظل يحلم بجمالك فكل نهار وليل
تعيشي يا مراكش وربي لينا يخليك
راه هواك فقلوبنا يا اللي مالك مثيل
