رثاء في فاكهة الهندي

زجل : عبد الله شوكا

غير خليوني واللي يجرا ويطرا في

آش هاد الزمان اللي غلات فيه الهندية

نتمشى في السوق ما بقاو يهزوني رجلي

وما بقات تقضي لا خضرا لا زرقا لا قرفية

آش هاد الزمان اللي ما بقات فيه نية

حتى الحديث ما كاين غير لسان السلوكية

كنت ندخل للجنان سوا الصباح سوا العشية

وبالقراصة كنت نتخير ونجني كرموص الهندية

بالشطابة كنت نشطب ونقي الشوك بيدي

كل شي كان موجود ها الصفرا ها الخضرا ها العكرية

كان الخير الدافك ما كاين غير نقي وارا لي

وكان الهندي بالعرارم وفي الشبعة داير مزية

آش هذا الزمان نشوف سم الحشرة القرمزية

وشجرة الهندي نشوفها تبكي قدام عيني

حرمتو المسكين يا وجوه الغدر كلكم عنصرية

الهندي اصبح في بلادو غريب متلف السمية

اّنا اليوم مضيوم غلبني السوق وسوم الهندية

وليت نجول في السوق ونشوف غير بعيني

زمان هذا واش من زمان يالقادر بي

بغيت ماكلة الهندية ثاني ترجع لي