أنا الحي المحمدي

زجل: عبد الله شوكا-المغرب

أنا الحي المحمدي زين الدروبا
ما تلقى بحالي واخ تمشي حتى لكوبا
أنا حي كيرا، والغيوان، ولمشاهب، ومول النوبة
ساكني القاري، والحلايقي، ومول الكتوبا
كل الدروبا تنعت فيَّ: أنا أعجوبة
تغنّات فيَّ العيوط ومول الراكوبة
أنا مهيّج العقول وملاقي القلوبا
وفي حلقتي جذب المجذوب والمجذوبة
قالوا ما بقى فن، والعقول مسلوبة
مشات أيامي وولات سوايعي مقلوبة
بغيت أيامي ترجع ونولي أنا سيد الدروبا
وترفع قيمتي قدّام العقول المغلوبة
أنا الحي المحمدي، سميتي ولات ملغومة
مشات أيامي مع الرواد وكرمات الخروبة
يا أولاد الحي، تجمعوا ورجعوا لي السومة
ووقفوا على خيمتي، ديك المهدومة.