الدنيا ميزان(قصيدة زجلية)

بقلم : مينة منصور، باريس

الفم تيقول الحبيب  

والقلب عامر حبوب  

السن تيضحك للسن  

والباطن عامر عيوب  

يا صاحبي القلب ميزان  

والفعل شاهد بين الناس  

لي دار الشر فالإنسان  

يلبس ندم ما عندو قياس  

الغدّار يمشي مرفوع  

والذنوب ديالو ثقيلة  

نهارو يبان مجموع  

وليلتو وحدو طويلة  

 أما المغيّار عينُو زايغة  

ما تشبعو عشرة ولا دار  

حتى ماكلتو ما مصدقة  

ويبقى يجري وهو كل ضرار  

المنافق جوج وجوه فالسوق  

وجه معاك ووجه عليك  

كلامُو شهد فوق الحبوق  

وفعلُو كالعنكبوت، سُمّ فإيديك 

الفم تيقول الحبيب  

والقلب عامر حبوب  

والسن تيضحك للسن  

والباطن عامر عيوب  

 أما الطيب مول القلب صافي  

نيتو بيضا بلا تلوين  

يعطي وما ينتظر اعتراف  

ويمشي وربو عليه معين  

السخي فاتح بابو  

قبل ما يطلب السايل 

الله يفتحلو حسابو  

ويرزقو من حيث ما قايل  

مول النية الصافية منصور  

ولو تقلب الزمان عليه  

دعوتو تطلع بلا سور  

وترجع رحمة ليه  

الفم تيقول الحبيب  

والقلب عامر حبوب  

والسن تيضحك للسن  

والباطن عامر عيوب 

والكدّاب حبالو قصار  

ولو طال اللعب يطيح  

الصريح ضيّو نهار  

والكذب عتمة تجرح الريح  

الدنيا كتبقى ميزان  

تادور وتدور بلا أمان  

ما تنسى حتى حبّة بدّور  

ولا دمعة مظلوم أو ضربة غدّار  

دنيا ميزان ما تنام  

اليوم ظالم، غدّا يتحاسب  

ما كاين لا هروب لا نسيان  

كل شي مكتوب… وحتى شي ما دايم